Göngum í skólann
Í Lágafellsskóla í fyrramálið, 9. september, mun Ólöf Nordal innanríkisráðherra hleypa af stokkunum verkefninu Göngum í skólann. Markmið verkefnisins eru að hvetja börn til að ganga í og úr skóla og auka færni þeirra til að ferðast á öruggan hátt í umferðinni. Þetta er níunda árið sem þetta verkefni er unnið hér á landi.
Göngum í skólann er samstarfsverkefni Samgöngustofu, Íþrótta – og Ólympíusambands Íslands, Ríkislögreglustjóra, Embættis landlæknis, mennta- og menningamálaráðuneytis, Slysavarnafélagsins Landsbjargar og Heimilis og skóla.
Nýr umferðarvefur – umferd.is
Samgöngustofa mun nota þetta tækifæri til að opna endurhannaðan umferðarvef www.umferd.is sem er samvinnuverkefni Samgöngustofu og Grundaskóla á Akranesi, móðurskóla umferðarfræðslu. Umferðarvefurinn er ætlaður nemendum, kennurum og foreldrum og inniheldur skemmtilega umferðarfræðslu fyrir börn sem er ætlað að auka öryggi þeirra í umferðinni. Meðal nýrra verkefna má nefna bókaflettara þar sem nemendur geta æft sig í lestri um leið og þeir fræðast um mikilvægar umferðarreglur. Samhliða lestrinum getur nemandinn hlustað á upplestur Sigrúnar Eddu Björnsdóttur leikkonu.
Dagskrá opnunarhátíðarinnar hefst kl. 08:30:
- Nemendur, kennarar og aðrir gestir mæta á sal.
- Jóhanna skólastjóri býður gesti velkomna.
- Lárus Blöndal forseti ÍSÍ stýrir dagskránni.
- Haraldur Sverrisson, bæjarstjóri Mosfellsbæjar flytur stutt ávarp.
- Ólöf Nordal innanríkisráðherra flytur stutt ávarp og opnar nýjan umferðarvef.
- Tónlistaratriði frá Lágfellsskóla.
- María Ólafsdóttir syngur nokkur lög.
- Aðstandendur verkefnisins, Ólöf Nordal, innanríkisráðherra, Haraldur Sverrisson bæjarstjóri Mosfellsbæjar, starfsfólk og nemendur Lágafellsskóla setja Göngum í skólann með viðeigandi hætti með því að ganga af stað.
