Þórólfur Árnason skipaður forstjóri Samgöngustofu

31.7.2014

Hanna Birna Kristjánsdóttir, innanríkisráðherra, hefur skipað Þórólf Árnason rekstrarverkfræðing í embætti forstjóra Samgöngustofu, en hæfisnefnd mat Þórólf hæfastan þeirra 24 umsækjenda sem sóttu um starfið. Þórólfur mun hefja störf þann 6. ágúst næstkomandi og tekur hann við af Hermanni Guðjónssyni, fráfarandi forstjóra, sem óskað hafði eftir lausn frá störfum. Mun Hermann áfram sinna ráðgjafastörfum á vegum Samgöngustofu.

Þórólfur hefur á síðustu árum starfað sem sjálfstætt starfandi ráðgjafi, verið stjórnarformaður Isavia, unnið að stofnun jarðvarmaklasa með Gekon og sinnt fleiri verkefnum. Þá sinnti hann verkefnastjórn við sameiningu Flugstoða og Keflavíkurflugvallar og við stofnun Isavia árið 2010. Áður hafði Þórólfur verið forstjóri Skýrr, Icelandic Group, Tal og borgarstjóri í Reykjavík á árunum 2003-2004.

Þórólfur lauk M.Sc. prófi í iðnaðar- og rekstrarverkfræði frá Danmarks Tekniske Hojskole árið 1981 og B.Sc. prófi í vélaverkfræði frá Háskóla Íslands árið 1979. Hann er kvæntur Margréti Baldursdóttur og eiga þau tvö börn.

Um leið og við óskum Þórólfi til hamingju með nýtt starf þökkum við Hermanni Guðjónssyni, fráfarandi forstjóra Samgöngustofu, fyrir vel unnin störf.