Réttindi flugfarþega í verkföllum

15.12.2017

Áhrif verkfalls á flugumferð veldur því að margir flugfarþegar komast ekki til áfangastaðar síns á réttum tíma eða jafnvel alls ekki. Í þeim tilfellum eiga þeir mögulega rétt á bótum en í öllum tilfellum eiga þeir rétt á þjónustu, s.s. máltíð, flutningi til og frá flugvelli og gistingu, eftir því sem við á.

  • Við tafir á flugi sem varir lengur en 3 klst., eða aflýsingu flugsins skal farþegum boðið eftirfarandi endurgjaldslaust:
  • a) máltíðir og hressing í samræmi við lengd tafarinnar,
  • b) hótelgisting,
    — ef farþegi neyðist til að bíða eina eða fleiri nætur eftir fari,
    eða
    — ef farþegi neyðist til að bíða lengur en hann gerði ráð fyrir,
    c) flutning á milli flugvallar og gistiaðstöðu (hótel eða annað).
  • Þar að auki skal farþegum boðið að hringja tvö símtöl eða senda skilaboð um fjarrita eða bréfsíma eða með tölvupósti þeim að kostnaðarlausu.
  • Við beitingu þessarar greinar skal flugrekandinn huga sérstaklega að þörfum hreyfihamlaðra og fylgdarmanna þeirra og einnig að þörfum fylgdarlausra barna.
  • Þegar flugi er aflýst eða því er seinkað þá ber flugrekanda eða flytjanda að afhenda farþegum skriflegar upplýsingar um réttindi þeirra.

Þegar um verkfall er að ræða falla réttindi um skaðabætur niður í sumum tilfellum, alltaf þegar um verkfall þriðja aðila er að ræða, þ.e. ekki starfsfólks flugrekanda.  En þegar um verkfall starfsfólks flugrekanda er að ræða, sem boðað er með góðum fyrirvara, þá flokkast það almennt ekki undir óviðráðanlegar aðstæður.  Skyndiverkföll flokkast þó undir óviðráðanlegar aðstæður.

Í þeim tilfellum þar sem farþegar þurfa að greiða kostnað  vegna þeirra atriða sem talin eru upp hér að ofan, þurfa þeir að geyma kvittanir og sækja svo um endurgreiðslu frá viðkomandi flugrekanda.

Sjá nánari upplýsingar um réttindi flugfarþega hér á vefnum .