Ný stofnun

14.6.2013

Nýtt merki Samgöngustofu.

Í morgun var haldinn fyrsti starfsmannafundur Samgöngustofu,  nýrrar stjórnsýslustofnunar samgöngumála, sem mun taka til starfa 1. júlí nk. Stofnunin mun annast stjórnsýslu og eftirlit í samgöngum og þangað flytjast verkefni Flugmálastjórnar og Umferðarstofu auk stjórnsýslu- og eftirlitsverkefna Siglingastofnunar Íslands og Vegagerðarinnar. Hjá stofnuninni munu starfa um 160 manns.

Hermann Guðjónsson, sem verður forstjóri Samgöngustofu, stýrði fundi og fór yfir markmiðin með hinni nýju stofnun. Er henni ætlað að vera sameinuð öflug stofnun sem vinnur að  öryggum samgöngum fyrir fólk og fyrirtæki. Faglegi þátturinn verði í hávegum hafður en einnig skilvirkni, hagkvæmni og góð þjónusta. Á fundinum var jafnframt farið yfir skipulag Samgöngustofu, helstu verkefni og kynnt merki stofnunarinnar. Merkið hannaði Ámundi Sigurðsson grafískur hönnuður.

Hanna Birna Kristjánsdóttir innanríkisráðherra flutti stutt ávarp og hvatti starfsmenn til að nýta sér þau tækifæri sem framundan væru á þessum tímamótum, þegar ný stofnun tæki til starfa við þá endurskipulagningu á samgöngustofnunum sem ákveðin hefur verið. Sagði hún nýja og öfluga stofnun geta gert góða þjónustu enn betri og hvatti starfsmenn til að halda áfram á þeirri braut.