Heimsókn frá Evrópusambandinu
Á dögunum fékk Siglingastofnun Íslands heimsókn frá fulltrúum framkvæmdastjórnar Evrópusambandsins ( DG Employment Health, Safety and Hygiene at Work Unit) ásamt fulltrúum frá sendiskrifstofu ESB, innanríkisráðuneytinu og utanríkisráðuneytinu til að ræða heilbrigðismál og vinnuöryggi um borð í íslenskum skipum. Hópurinn heimsótti einnig innanríkisráðuneytið, Flugmálastjórn og Vinnueftirlitið til að ræða mál er snerta vinnuöryggi á landi og í flugi.
Markmið heimsóknarinnar var að:
1. ræða innleiðingu ESB-gerða í íslenskar reglur að því er varðar heilbrigðismál og vinnuöryggi um borð í íslenskum skipum (helstu áherslumál í tilskipun 89/391/EBE)
2. að ræða almennt stöðu heilbrigðismála og vinnuöryggis um borð í íslenskum skipum
3. að safna upplýsingum um skipulag stjórnsýslu og getu til að framfylgja reglum á sviði heilbrigðismála og vinnuöryggis um borð í íslenskum skipum.
Á fundinum kom fram að hópurinn væri að kynna sér stöðu heilbrigðis og vinnuöryggis á Íslandi í framhaldi af aðildarumsókn Íslands að ESB um þau mál er fjallað í 19.kafla um félags- og vinnumál.
Ísland hefur innleitt tilskipun ráðsins nr. 89/391/EBE frá 12. júní 1989 um lögleiðingu ráðstafana er stuðla að bættu öryggi og heilsu starfsmanna á vinnustöðum með reglugerð um lágmarkskröfur er varða öryggi, hollustuhætti og heilsu við vinnu um borð í skipum, 200/2007.
Fræðsluefni um heilbrigði og vinnuöryggi um borð í skipum sem Siglingastofnun Íslands hefur gefið út:
Pési:
Þjónustu-, þjálfunar- og öryggishandbækur í fiskiskipum
Myndbönd:
Vinnuöryggi við fiskveiðar fyrri hluti
Vinnuöryggi við fiskveiðar seinni hluti
Bækur:
Heilsuvernd sjómanna 2008
Vinnuvistfræði fyrir sjómenn 2004
Lækningabók sjófarenda 2003
