Höldum fókus

Fjórða átakið gegn akstri undir áhrifum farsíma

1.2.2019

Holdum-fokus

Í nýjasta Höldum fókus átaki Samgöngustofu, Sjóvá og Strætó eru farnar nýjar leiðir til að minna ökumenn á hversu hættulegt það er að nota símann undir stýri. Að þessu sinni tengist fólk herferðinni með Instagram reikningi sínum, en í samstarfi við Google er notuð gervigreind til að sérsníða sögulínu að lífstíl hvers og eins. Þannig fær notandinn upp sögu sem tengist vináttu, fjölskyldu, gæludýrum eða ferðalögum, allt eftir því hvað er mest áberandi í hans „samfélagsmiðlasjálfi“. Myndir notandans blandast síðan inn í sérsniðna sögulínu og er upplifun hvers og eins því einstök.

Tjarnargatan sá um hugmyndavinnu og framkvæmd verkefnisins og er óhætt að lofa sterkum hughrifum sem munu fá fólk til að hugsa sig tvisvar um áður en það tekur aftur upp símann við akstur. Verkefnið uppfyllir öll skilyrði um persónuvernd og eru engar upplýsingar af reikningi notandans varðveittar eða miðlað áfram.

Þetta er fjórða skiptið sem Höldum fókus átakinu er hrundið af stað en það hefur ætíð vakið mikla athygli og sýnt mælanlegan árangur í könnunum sem Samgöngustofa hefur gert. Verkefnið á Íslandsmet í deilingu á samfélagsmiðlum en fyrsta átakinu var deilt u.þ.b. 36.000 sinnum á Facebook. Hluti fyrri verkefna Höldum fókus hafa verið notaður erlendis, og hafa nokkur lönd lýst yfir áhuga á að setja upp sambærilega herferð og þessa.