Aukin umhverfisvernd og öryggi með breytingu reglugerðar

24.4.2013

Fyrirhugaðar eru breytingar á reglugerð um gerð og búnað ökutækja sem í stuttu máli hefur í för með sér að innflytjendur ökutækja sem koma ekki frá Evrópu þurfa í framhaldi af gildistöku reglugerðarinnar 1. maí að leggja fram aukin gögn til að fá ökutækið skráð hér á landi.

Á vef innanríkisráðuneytisins http://www.innanrikisraduneyti.is/frettir/nr/28514 er fyrrgreind breyting á reglugerðinni til umsagnar. Breytingin felur í sér innleiðingu á tilskipun 2007/46/EB en markmið þeirrar tilskipunar Evrópusambandsins er að tryggja að ný ökutæki, íhlutir og aðskildar tæknieiningar sem sett eru á markað fyrir ökutæki uppfylli kröfur um öryggi og umhverfisvernd.

Breytingarnar hafa í för með sér að innflytjendur ökutækja utan Evrópu þurfa að framvísa gögnum sem hingað til hefur ekki þurft við skráningu hjá Umferðarstofu. Þau gögn verða að koma frá framleiðanda ökutækisins eða frá viðurkenndri tækniþjónustu og í þeim þurfa eftirfarandi 15 atriði og upplýsingar að koma fram:

1.  Gerð ökutækis,
2.  Tegund ökutækis,
3.  Undirtegund ökutækis,
4.  Verksmiðjunúmer,
5.  Framleiðandi,
6.  Slagrými,
7.  Orkugjafi,
8.  Burðargeta einstakra ása,
9.  Afl hreyfils (kW),
10. Hávaði við snúning; kyrrstöðumæling og akstursmæling,
11. Leyfð heildarþyngd,
12. Eiginþyngd,
13. Útblástursmengun (EURO staðall),
14. Þyngd hemlaðs eftirvagns,
15. Þyngd óhemlaðs eftirvagns,

Gert er ráð fyrir að breytingin taki gildi þann 1. maí nk. Frekari upplýsingar um efni reglugerðarbreytingarinnar er að finna á vef innanríkisráðuneytisins http://www.innanrikisraduneyti.is/frettir/nr/28514 en jafnframt er hægt að leita til tæknideildar Umferðarstofu í síma 580-2000.