Nýr hjólastígur milli Reykjavíkur og Mosfellsbæjar

14.12.2012

Hjólasveinar og meyjar glöddust innilega í dag er nýr hjóla- og göngustígur milli Mosfellsbæjar og  Reykjavíkur var formlega tekinn í notkun af borgarstjóra, bæjarstjóra Mosfellsbæjar og vegamálastjóra. Eftir að klippt hafði verið á borða stigu hjólasveinar og meyjar á reiðhjól sín og héldu með klingjandi bjölluhljóm eftir stígnum.
Nýi stígurinn er góð samgöngubót og er hann hluti af stofnstígakerfi höfuðborgarsvæðisins en í sumar gengu Vegagerðin og Reykjavíkurborg frá tímamótasamningi um uppbyggingu þess. 
Reykjavíkurborg sinnir vetrarþjónustu á nýja stígnum alla leið inn í byggð í Mosfellsbæ og kemur það sér vel fyrir þá fjölmörgu sem stunda hjólreiðar allan ársins hring. Stígurinn er einnig tilvalinn fyrir göngufólk og er hjólreiðafólk hvatt til að nota bjöllur sínar til að gera þeim viðvart, ekki síst nú í skammdeginu.  Í vor þegar veður leyfir verður gengið frá yfirborðmerkingum til að aðskilja gangandi og hjólandi.  Einnig er eftir að ganga frá hraðahindrun á aðkomuveg að Bauhaus til að tryggja enn frekar öryggi hjólafólks og gangandi vegfarenda.
 
Vegagerðin, Mosfellsbær og Reykjavíkurborg stóðu sameiginlega að framkvæmdum við stíginn sem fólust í tengingu stígakerfa sveitarfélaganna með lagningu stofnstígs frá athafnasvæði skógræktar Mosfellsbæjar við Hamrahlíð að gönguleið við akstursrampa að Bauhaus í Höllum. Verkið var boðið út í lok maí og var verktakafélagið Glaumur ehf. hlutskarpast.  Sett var upp göngubrú, jarðvegsskipti námu 4.500 rúmmetrum og malbikaðir voru um 5 þúsund fermetrar. Gengið var frá ræsum og 38 ljósstólpar settir upp.  Stígurinn var lagður i gegnum skógræktarsvæðið í sátt við Skógræktarfélagið og að þess beiðni voru tré sem felld voru skilin eftir til að brotna niður náttúrulega. Einnig tókst vel til með að færa gróðurþekju úr stígstæðinu og endurnýta á fláum við stíginn. Heildarkostnaður framkvæmda nam um 60 milljónum króna, sem deilist á verkkaupa.

Ljósmynd af borgarfulltrúum við opnun hjólreiðastígs