Sjö slösuðust á höfuðborgarsvæðinu í síðustu viku

23.9.2014

Ekið yfir á öfugan vegarhelming

Að morgni mánudagsins 15. september varð umferðarslys á Grandagarði við Sjóminjasafnið Vík. Bifreið var beygt yfir á rangan vegarhelming undan bifreið, sem var stöðvuð og ætlað að bakka í stæði, og lenti þá framan á annarri er ekið var á móti. Einn var fluttur á slysadeild.

Rafmagnsvespu ekið á gangandi vegfaranda

Síðdegis miðvikudaginn 17. september ók kona rafmagnsvespu aftan á karl á hjólastíg við Engjateig  með þeim afleiðingum að hún kastaðist af vespunni og slasaðist. Ökumaðurinn ætlaði sjálfur að leita læknis. Hún sagði manninn hafa skyndilega gengið í veg fyrir hana. Hann sagðist hafa verið á gangi þegar hann hafi heyrt í einhverju fyrir aftan sig, fært sig þá til hægri, en í því hafi vespunni verið ekið utan í hann. Hann féll við og slasaðist lítillega. Hjólið var mikið skemmt.

Aftanákeyrsla

Föstudaginn 19. september var bifreið ekið aftan á aðra á Miklubraut við Háaleitsbraut. Bifreiðinni A var ekið austur Miklubraut að Háaleitisbraut þegar ökumanni sortnaði fyrir augu með þeim afleiðingum að bifreiðin lenti aftan á B. Bifreiðin B var kyrrstæð við gatnamótin þegar óhappið varð. Við höggið kastaðist B aftan á C, sem einnig var kyrrstæð. Tveir, ökumaður og farþegi, voru fluttir á slysadeild eftir áreksturinn. Annar ökumaður kvartaði jafnframt undan verkjum í hálsi og baki.

Ekið í veg fyrir bifreið á gatnamótum

Síðdegis á föstudeginum varð svo árekstur á gatnamótum Flatahrauns og Reykjavíkurvegar. Bifreiðinni A var ekið suður Reykjavíkurveg á móti grænu umferðarljósi og beygt til vinstri, áleiðis inn á Flatahraun. Bifreiðinni B var ekið Reykjavíkurveg til norðurs á móti grænu umferðarljósi við Flatahraun þegar A var skyndilega ekið í veg fyrir hana. Ökumaður sá ekki B áður en óhappið varð á gatnamótunum. Einn var fluttur á sjúkrahús til aðhlynningar.

Gæta þarf að því að gefa hljóðmerki

Af lestri þessarar samantektar má ljóst vera að ökumenn þurfa að taka mið af aðstæðum, sýna aðgæslu og fara sérstaklega varlega við krefjandi skilyrði. Sama skylda hvílir á öðrum vegfarendum. Stjórnendur reiðhjóla og rafmagnshjóla sem fara um á gangstígum innan um gangandi vegfarendur þurfa að gæta sérstakrar varúðar og gefa hljóðmerki þegar við á. Jafnframt er aldrei of brýnt fyrir ökumönnum að huga að hæfilegu bili milli ökutækja og huga vel að umferð á móti þegar beygt er til vinstri á gatnamótum.