Hollráð fyrir ferðalagið

Hér má sjá ýmis gagnleg ráð sem gera ferðalagið öruggara og ánægjulegra

  • Hugið vel að börnunum í bílnum. Notið aðeins viðurkenndan öryggisbúnað sem hentar hæð og þyngd barnsins. Gott er að stöðva reglulega bílinn og hleypa börnunum út. Hér má finna allt um öryggi barna í bíl.
  • Þau sem þurfa að fara hægar skulu haga akstri þannig að auðvelt og öruggt sé að fara framúr.
  • Þau sem hyggjast fara framúr skulu ekki undir neinum kringumstæðum gera það þar sem er heil óbrotin lína á milli akstursstefna eða takmörkuð sýn fram á veginn.
  • Akið samkvæmt aðstæðum og farið ekki hraðar en leyfður hámarkshraði segir til um. Haldið jöfnum hraða og forðist framúrakstur.
  • Gætið þess að vera vel úthvíld á meðan á akstri stendur.
  • Eftir áfengisneyslu skal bíða með að setjast undir stýri þar til allt áfengi er farið úr blóðinu. Það getur tekið allt að 18 klst.
  • Ef syfja og þreyta sækir er gott að leggja bílnum á öruggum stað (ekki á veginum) og hvílast, jafnvel sofna, þótt ekki væri í nema 15 mínútur.
  • Athugið hvort öll ljós og önnur öryggisatriði í bifreiðinni og tengivagninum séu í lagi.
  • Gangið þannig frá farangri að ekki sé hætta á að hann kastist til við árekstur eða bílveltu.
  • Athugið hvort hjólbarðarnir séu í lagi – bæði hvað slit og loftþrýsting varðar.
  • Ef ekið er með eftirvagn, eins og tjaldvagn, hjólhýsi o.fl. þá er leyfður hámarkshraði aldrei meiri en 80km/klst. Ekki gleyma þegar þið mætið stórum bíl að eftirvagninn er mögulega breiðari en bifreið ykkar.
  • Mikill hiti í bílnum eykur líkur á þreytu og syfju. Gerið hlé á akstri á eins til tveggja klst. fresti.
  • Gætið þess að nærast og drekka vatn eða aðra hollustu svo ekki sæki á ykkur þreyta á langferðum.
  • Gætið fyllsta öryggis  inná tjaldsvæðum og akið ekki þar nema bráða nauðsyn beri til.
  • Ekki stöðva á veginum til að skoða náttúruundur eða taka myndir. Notið útskotin eða aðra örugga staði.
  • Tökum tillit til hjólreiðafólks
  •  Hjólreiðafólk athugið að það er bannað að hjóla hlið við hlið á veginum.  
  • Að lokum. Góða skapið og tillitsemin eru góðir ferðafélagar.
    Góða ferð og komið heil heim!