Útgáfa hjólastöðuvottorða

Útg.nr: 02           Útg.dags: 09.06.2010

Krafa um vottorð um hjólastöðu: Gerð er krafa um framvísun á hjólastöðuvottorði við endurskoðun ökutækja ef dæmt hefur verið á hjólastillingu í almennri skoðun, við breytingu á tjónaskráningu í ökutækjaskrá og við sérskoðun . Ef um er að ræða breytingu á skráningu skal vottorð fylgja með til Umferðarstofu.

Heimild til útgáfu vottorða: Umferðarstofa heldur lista yfir þá aðila sem hún hefur viðurkennt til útgáfu á vottorðum um hjólastöðu, US.355. Þeir sem fá slíka heimild skulu uppfylla þau skilyrði sem lýst er hér að neðan.

Umsókn og heimild: Sækja skal um heimild til útgáfu vottorða um hjólastöðu til Umferðarstofu á eyðublaði  US.132. Umferðarstofa gefur út heimildina á nafn verkstæðis og mælingarmanns / -manna.

Kröfur um aðstöðu: Verkstæði sem gefur út hjólstöðuvottorð skal búið hjólastillitæki og aðstöðu til hjólastillinga. Hjólastillitæki skal haldið í fullkomnu lagi og kvarðað og stillt samkvæmt fyrirmælum framleiðanda þess.

Ábyrgðarmaður verkstæðis: Ábyrgðarmaður verkstæðis skal vera sveinn eða meistari í bifvélavirkjun eða bifreiðasmíði. Ábyrgðarmaður ber ábyrgð á mælingum sem  framkvæmdar eru af mælingarmönnum verkstæðisins og búnaði sem notaður er. Ábyrgðaraðili verður að hafa setið námskeið hjá í reglum um hjólastillingar á ábyrgð útgefanda á síðustu 5 árum. Ábyrgðarmaður skal tilkynna ef skráður mælingarmaður hættir störfum og ef nýr hefur störf, einnig ef breytingar verða á tækjabúnaði.

Kröfur til mælingarmanna: Mælingarmaður skal vera bifvélavirki eða bílasmiður í föstu starfi hjá því verkstæði er fær heimild til útgáfu vottorða. Mælingarmaður skal hafa sótt viðurkennt námskeið í hjólastillingum hjá Iðunni Fræðslusetri, Borgarholtsskóla eða samsvarandi, og hann skal hafa staðist úttekt á þau hjólastillitæki sem verkstæðið notar hjá aðila sem viðurkenndur er af Umferðarstofu. Að auki þarf mælingarmaður að hafa setið námskeið hjá Umferðarstofu í reglum um hjólastillingar og ábyrgð útgefanda á síðustu 5 árum.

Kröfur um verklag við mælingu: Hjólastilling skal vera framkvæmd samkvæmt fyrirmælum framleiðanda viðkomandi bifreiðar. Ef ás bifreiðar er tekinn úr annarri bifreið skal miða við gildi sem eru gefin fyrir þá bifreið sem viðkomandi ás kemur úr. Við stillingu skal yfirfara stýrisbúnað, ganga úr skugga um að ekki sé slit eða skemmd í búnaðinum og að allir hlutir séu í lagi. Ef um sérsmíðaða hluti er að ræða skal liggja fyrir vottorð frá óháðum aðila viðurkenndum af Umferðarstofu. Stilla skal bæði fram og aftur hjól bifreiðar.

Útgáfa vottorð og vistun gagna: Ekki skal gefa út vottorð nema stilling sé innan marka og skal hjólastöðuvottorð vera staðfesting á því að stilling sé innan marka framleiðanda. Útgáfuaðili skal geyma gögn um hjólastöðu og upplýsingar sem notaðar voru við stillingu í 5 ár. Halda skal skrá yfir viðhald og kvörðun stillitækja.

Eftirlit með aðilum og verklagi: Umferðarstofa hefur eftirlit með þeim sem hafa heimild til útgáfu hjólastöðuvottorða. Brot á reglum um útgáfu vottorða getur leitt til niðurfellingar á heimild. Aðilar sem hafa heimild til útgáfu vottorða verða að taka þátt í samanburðarskoðunum sé þess óskað af.

Eyðublöð og umsóknir: Hægt er að nálgast umsóknir og eyðublöð vegna útgáfu hjólastöðuvottorða hér á vefnum.
 

 


Var efnið hjálplegt? Nei