Skemmtibátar

Skipstjórar á skemmtibátum sem eru 6 metrar að skráningarlengd eða lengri þurfa að afla sér grunnþekkingar á öryggisþáttum sem tengjast siglingum og skipstjórn og hafa gilt skipstjórnarskírteini á skemmtibát

 Skilyrði fyrir skírteini

Tilvonandi skírteinishafar þurfa að hafa lokið bóklegu prófi en ekki er skilyrði að viðkomandi hafi áður setið bóklegt námskeið. Bókleg próf eru samin af Samgöngustofu á grundvelli námskrár sem stofnunin gefur út og fer prófdómari skipaður af Samgöngustofu yfir úrlausnir og metur færni. Tækniskólinn - skóli atvinnulífsins hefur boðið upp á bókleg próf og námskeið til undirbúnings þess.

Tilvonandi skírteinishafar þurfa jafnframt að hafa lokið verklegu prófi, sem haldin eru af prófdómurum sem skipaðir eru af Siglingastofnun. Nálgast má gátlista prófdómara vegna verklegra prófa á skemmtibát, annars vegar vélskip og hins vegar seglskip.

Umsóknarferli

Þeir sem ætla að sækja um skipstjórnarskírteini skemmtibáts þurfa að fylla út rafræna umsókn. Eftirtalin gögn þurfa að fylgja umsókn áður en hún er tekin til afgreiðslu:

  • Læknisvottorð um sjón, heyrn og heilbrigði sjómanna sem er yngra en 6 mánaða

  • Ein nýleg mynd í vegabréfastærð

  • Vottorð prófdómara bóklegs prófs (ef um frumútgáfu er að ræða)

  • Vottorð prófdómara verklegs prófs (ef um frumútgáfu er að ræða)

Gögnin er hægt að senda rafrænt sem fylgiskjöl með umsókninni. Einnig er hægt að senda gögn á netfangið sigling@samgongustofa.is eða í pósti merkt Samgöngustofu, Ármúla 2, 108 Reykjavík. 

Afgreiðsla

Samgöngustofa miðar við að afgreiða skírteini innan 10 virkra daga frá því öll gögn og greiðsla hafa borist. Umsókn er aðeins tekin til afgreiðslu þegar gjald hefur verið greitt. Umsækjendur geta óskað eftir því að fá skírteinið sent í pósti eða sótt það á skrifstofu Samgöngustofu.

Greiðsla

Gjald fyrir umsókn um útgáfu og endurnýjun skemmtibátaskírteina fer eftir  gjaldskrá Samgöngustofu og er kr. 4300. Gjaldið greiðist inná reikning nr. 515-26-210777 í Íslandsbanka. Reikningseigandi er Samgöngustofa kt: 540513-1040. Greiðslukvittun skal senda á sigling@samgongustofa.is.  

Ítarefni

Hér má nálgast spurningar og svö r varðandi skemmtibátaskírteini. Samgöngustofa hefur auk þess útbúið kynningarbækling um skemmtibáta

Nánari upplýsingar um próf til skemmtibátaskírteinis er að finna í reglum nr.  393/2008 og um skírteinið í 17. gr. reglugerðar nr. 175/2008 með síðari breytingum.



Var efnið hjálplegt? Nei