Algengar spurningar um handfarangur

Hvar kaupi ég gegnsæjan 1 lítra poka með plastrennilás?

Þessa poka er hægt að fá í helstu matvöruverslunum á Íslandi.

Er leyfilegt að hafa hárblásara og krullujárn í handfarangri?

Já.

Er mikilvægt að hægt sé að loka plastpokanum með plastrennilás (eða sambærilegum lokunarbúnaði)?

Já, allar 100ml vökvaumbúðir sem fara í 1 lítra poka verða að rúmast þægilega fyrir til að auðvelda skimun.

Get ég haft með mér lyf í vökvaformi?

Farþega er leyfilegt að hafa með sér lyf í magni sem dugar á meðan ferðalagi stendur. Lyf gætu þurft að sæta vökvaskimun.

Hvað með lyf í töfluformi?

Farþega er eftir sem áður heimilt að hafa með sér lyf í töfluformi svo lengi sem öryggisverðir telji enga ógn stafa af þeim.

Hvað með sérstakt mataræði samkvæmt læknisráði ?

Farþega er heimilt að hafa með sér matvæli vegna sérstaks mataræðis í magni sem dugar á meðan flugferð stendur. 

Má ferðast með barnamat?

Farþega er heimilt að hafa með sér barnamat handa ungbarni í magni sem dugir á meðan flugferð stendur.

Undir hvað flokkast varalitur?

Varalitur flokkast ekki undir það að vera vökvi. Varagloss telst hins vegar til vökva.

Má ég ferðast með vökva í handfarangri (drykki, áfengi o.s.frv.) sem ég kaupi eftir að hafa farið í gegnum öryggisskoðun á Íslandi?

Farþegar geta eftir sem áður keypt allan vökva og aðrar vörur innan biðsvæðis flugstöðva Evrópska efnahagssvæðisins, en vörur sem seldar eru á því svæði hafa sætt sérstakri skoðun.

Hvað verð ég að hafa í huga ef ég flýg beint á áfangastað og held ekki áfram í tengiflug?

Ef flogið er beint á áfangastað frá Íslandi má vera með allan vökva í handfarangri sem keyptur er á biðsvæðinu.

Hvað verð ég að hafa í huga ef ég fer í tengiflug í Norður-Ameríku (Bandaríkjunum/Kanada)?

Ef farið er í tengiflug í Norður-Ameríku verður að setja vökva, sem keyptur er í verslun eftir að farið er í gegnum öryggisskoðun eða um borð í flugvél, í innritaðan farangur áður en haldið er áfram í tengiflug. Tækifæri til þess gefst eftir að farþegar hafa farið í gegnum tollskoðun við komuna í flugstöð í Norður-Ameríku.

Má ég ferðast með vökva í handfarangri sem ég kaupi áður en ég fer í innritun fyrir flug frá Norður-Ameríku til Íslands?

Vökvi, sem er keyptur áður en farþegi innritar sig, skal komið fyrir í innritunarfarangri.

Get ég ferðast með vökva í handfarangri sem keyptur er um borð í flugvél?

Heimilt er að fara með vökva sem keyptur er um borð í flugvél skráðri í ríki innan Evrópska efnahagssvæðisins inn í flugstöð á Íslandi ef varan er í innsigluðum poka. Farþegi verður einnig að geta framvísað kvittun sem staðfestir innihald pokans og kaupdagsetningu sé þess óskað af öryggisvörðum.