Vökvi í handfarangri

Vökva má ferðast með í handfarangri að eftirfarandi skilyrðum uppfylltum:

• Hver eining umbúða má að hámarki rúma 100 millilítra (1dl) af vökva.

• Allar umbúðirnar verða að rúmast í gegnsæjum eins (1) lítra plastpoka sem hægt er að loka með plastrennilás.

• Hverjum farþega er heimilt að hafa með sér einn poka.

• Með umbúðum er átt við flöskur, túpur, hylki og annað sem getur innihaldið vökva.

• Gosflöskur og dósir eru flestar stærri en 100 ml (1dl) og eru því ekki leyfðar inn fyrir öryggishlið.

Farþegar mega hafa meðferðis eftirfarandi nauðsynjar til persónulegra nota meðan á flugi stendur ef öryggisverðir telja ekki ógn stafa af þeim:

• Lyf í magni sem dugir meðan á ferðalagi stendur.

• Barnamat.

• Matvæli vegna sérstaks mataræðis.

Farþegum leyfist að hafa meðferðis inn á haftasvæði flugverndar vökva í poka með innsigli sem sýnir hvort lokun hans hafi verið rofin (STEBS - Security Tamper Evident Bag) að uppfylltum eftirfarandi skilyrðum:

a) Pokinn sé lokaður og beri þess ekki merki að reynt hafi verið að opna hann.
b) Að pokinn innihaldi kvittun sem færi sönnur á að kaup á vökva hafi átt sér stað í fríhöfn flugvallar eða um borð í flugvél.

Pokann skal aðskilja frá öðrum handfarangri fyrir skimun.

Hvað er vökvi?

Undir vökva flokkast m.a. gel, krem, smyrsl, og úðaefni, hvort sem er í flöskum, þrýstibrúsum, túpum eða öðrum umbúðum. Algengir hlutir sem fólk hefur með sér og flokkast undir vökva eru m.a.:

• Gos

• Áfengi

• Ilmvatn

• Rakakrem

• Tannkrem

• Varagloss

• Hárlakk

• Sápur

• Sjampó