Nám í flugumferðarstjórn
Til að fá leyfi til að starfa sem flugumferðarstjóri er nauðsynlegt að hafa skírteini flugumferðarstjóra
Þær kröfur sem þarf að uppfylla til slíks er að finna í reglugerð um skírteini flugumferðarstjóra og lúta þær m.a. að aldri, menntun og heilbrigði. Um er að ræða samevrópskar reglur og eru skírteini flugumferðarstjóra viðurkennd innan EES á grundvelli EES-samningsins.
Til að fá útgefið skírteini flugumferðarstjóra er skylda að umsækjandi sé handhafi nemaskírteinis í flugumferðarstjórn.
Nemaskírteini
Til að fá slíkt skírteini þarf umsækjandi að uppfylla eftirfarandi skilyrði:
- Hafa náð 18 ára aldri.
- Hafa lokið framhaldsskólanámi sem veitir aðgang að háskóla eða annarri sambærilegri menntun.
- Vera handhafi gilds heilbrigðisvottorðs.
- Hafa sýnt fram á fullnægjandi tungumálafærni í samræmi við ákvæði reglugerðar.
- Hafa lokið viðurkenndri grunnþjálfun í flugumferðarstjórn.
Nemaskírteini veitir skírteinishafa eftirfarandi réttindi:
- Rétt til að veita flugstjórnarþjónustu undir eftirliti starfsþjálfara.
- Rétt til að sækja um starfsþjálfun innanlands sem og innan EES svæðisins.
- Áritun til fjögurra ára sem veitir leyfi til starfsnáms, en að þeim tíma loknum má sækja um viðbótaráritun að undangenginni athugun á hvort handhafi standist skilyrði.
Skírteini flugumferðarstjóra
Til þess að geta sótt um skírteini flugumferðarstjóra þarf umsækjandi að uppfylla eftirfarandi skilyrði:
- Vera handhafi nemaskírteinis.
- Hafa náð 21 ára aldri.
- Vera með gilt heilbrigðisvottorð.
- Sýna fram á tungumálafærni samkvæmt reglugerð.
- Hafa lokið starfsþjálfun í flugstjórnardeild hjá veitanda flugumferðarþjónustu með fullnægjandi árangri og staðist viðeigandi próf.
