Sjóferðabækur
Sjóferðabækur gegna hlutverki skilríkis og eru staðfesting á að viðkomandi sé sjómaður
Með áritun skipstjóra í sjóferðabók geta sjómenn haldið utan um siglingatíma sinn.
Skilyrði þess að fá útgefna sjóferðabók eru:
- Að umsækjandi sé með íslenskt ríkisfang.
- Að umsækjandi sé á sjómannaskrá skv. lögskráningarkerfi sjómanna.
Á vefsíðu Samgöngustofu er hægt að senda rafræna umsókn um útgáfu sjóferðabókar. Skila þarf inn nýlegri passamynd á ljósmyndapappír. Myndina má senda með pósti til Samgöngustofu í Ármúla eða skila inn þegar bókin er sótt.
Sé umsækjandi ekki á sjómannaskrá þarf hann að leggja fram staðfestingu útgerðarfélags um að hann starfi á skipum sem félagið annast rekstur á. Þetta getur verið t.d. staðfestur ráðningarsamningur eða yfirlýsing þar að lútandi sem er ekki eldri en 30 daga.
Gildistími
Til samræmis við beiðni siglingaráðs var ákveðið að gildistíma sjóferðabóka verði breytt í samræmi við gildistíma vegabréfa. Sjóferðabækur gefnar út frá og með 25. mars 2021 munu því gilda í 10 ár frá útgáfu. Sjóferðabækur gefnar út fyrir þann tíma halda gildistíma sínum í samræmi við dagsetningar skráðar í bókina.
Afgreiðsla
Samgöngustofa miðar við að afgreiða sjóferðabók innan 12 virkra daga frá því að gögn og greiðsla hafa borist. Nauðsynlegt er að umsækjandi sanni á sér deili og undirriti sjóferðabókina hjá Samgöngustofu í Ármúlanum þegar hún er sótt.
Um sjóferðabækur er fjallað í 6.gr sjómannalaga nr.
35/1985.
