Flugnám, verkleg kennsla – hertar aðgerðir um allt land vegna COVID-19

26.10.2020

Ný reglugerð heilbrigðisráðherra um takmörkun á samkomum og hertar aðgerðir tók gildi 20. október og gildir til og með 10. nóvember 2020. Ýmis starfsemi sem krefst snertingar eða hætta er á snertingu á milli fólks eða mikilli nálægð, eða þar sem notkun á sameiginlegum búnaði getur haft smithættu í för með sér er áfram óheimil. 

Það er mat heilbrigðisráðuneytis að verklegt flugnám og kennsla, þar sem ekki er unnt að viðhalda 2 metra nálægðartakmörkun, er óheimilt á gildistíma reglugerðar nr. 958/2020. Það skal tekið fram að framangreindar takmarkanir taka ekki til aðstæðna þar sem smithætta vegna nándar er ekki til staðar eða unnt er að virða 2 metra nálægðartakmörkun, t.d. í svokölluðu „sólóflugi“ flugnema, þar sem flugkennari er ekki í flugvélinni með nemanum.

Sjá nánar REGLUGERÐ um takmörkun á samkomum vegna farsóttar nr. 1015/2020, dags. 18. október 2020.