Undirskrift aðlögunarsamnings Íslands að EUROCONTROL
Samningurinn var undirritaður í dag af Jóni Gunnari Jónssyni, forstjóra Samgöngustofu og Eamonn Brennan, forstjóra Eurocontol. Samkvæmt skilmálum hans á Ísland sæti áheyrnarfulltrúa og getur tekið þátt í verkefnum og starfsemi Eurocontrol að sama marki og aðildarríki.
Frá undirskrift samningsins í morgun: Eamonn Brennan forstjóri Eurocontrol til vinstri og Jón Gunnar Jónsson forstjóri Samgöngustofu til hægri.
Eurocontrol er evrópsk milliríkjastofnun sem hefur allt frá stofnun árið 1960 haft markmið um stuðning við flug og flugleiðsögu í Evrópu. Ef frá eru talin fáein smáríki sem ekki sinna verkefnum sem tengjast loftrýminu er Ísland nú eina Evrópulandið utan aðildar en mun frá 1. janúar 2025 verða 42. aðildarríkið. Viðræður um hugsanlega aðild hafa staðið yfir um árabil en aðlögunarsamningurinn nú var undirritaður að fenginni heimild innviðaráðuneytisins.
Helsti ávinningur aðildar er full þátttaka í miðlægri flæðisstjórnun flugumferðar fyrir samevrópska loftrýmið og samræmdri krísustjórnun vegna t.d. eldgosa og heimsfaraldra. Henni fylgir einnig aðgangur að kerfum, gagnabönkum, greiningarvinnu, tæknilausnum, þjálfun og stuðningi við ýmsa þætti flugmála sem snúa að rekstrarstjórnun flugumferðar, rekstri flugvalla, skilvirkni, öryggi og netvernd svo nokkuð sé nefnt.
Hópurinn fyrir framan Samgöngustofu í morgun. Jón Gunnar og Eamonn fyrir miðju. Auk þeirra eru á myndinni fulltrúar Eurocontrol, Samgöngustofu, innviðaráðuneytisins og Isavia.
Við undirritun samningsins sagði Jón Gunnar: „Eftir jákvætt samstarf við Eurocontol á undanförnum árum hefur með undirskrift samningsins verið stigið mikilvægt skref. Vegna landfræðilegrar legu Íslands eru flug og flugleiðsaga einstaklega mikilvæg til grundvallar efnahags og velmegunar þjóðarinnar. Samvinna þjóða á jafningjagrunni stuðlar að uppbyggingu og viðhaldi innviða á sviði flugmála. Með undirritun samningsins hafa stjórnvöld nú staðfest þá fyrirætlun að Ísland gerist fullgildur aðili að Eurocontol.“
Eamonn Brennan sagði: „Ég er ánægður með að undirritun þessa samning sem er mikilvægt skref í átt að samþættingu Íslands sem 42. aðildarríkis Eurocontrol 1. janúar 2025. Við höfum unnið náið með Íslandi í mörg ár og fögnum ákvörðun þeirra um að ganga í Eurocontrol og taka á sig öll réttindi og skyldur aðildarríkja okkar. Ísland er vaxandi áfangastaður í Evrópu – með yfir 150 flug daglega að meðaltali nú í sumar - þannig að frekari samþætting þeirra inn í evrópska netið mun nýtast bæði í rekstrarlegum og stefnumótandi tilgangi.“