Ekið í veg fyrir tvo reiðhjólamenn

2.10.2014

Slys varð í síðustu viku við Suðurlandsbraut þegar tveir menn á sitt hvoru reiðhjólinu lentu í árekstri við vörubifreið sem ekið var í veg fyrir þá þar sem þeir fóru um reiðhjólastíg. Reiðhjólamennirnir voru á  ferð um stíginn þegar þeir sáu skyndilega vörubifreið þvera leið þeirra, en bifreiðinni var ekið frá  leikskóla við Suðurlandsbraut og yfir stíginn. Samkvæmt upplýsingum frá lögreglu segist ökumaðurinn hafa hægt á sér áður en hann hélt yfir stíginn en þar sem hann hafi ekki séð neina umferð á stígnum hafi hann farið af stað en vissi þá ekki fyrr en hann heyrði dynk.  Báðir reiðhjólamenn slösuðust við óhappið, annar  þó talsvert meira. Báðir voru fluttir á sjúkrahús með sjúkrabifreið.

Samgöngustofa vill árétta mikilvægi þess að ökumenn hugi vel að aðstæðum áður en göngu- og hjólastígar eru þveraðir sérstaklega þar sem erfitt getur reynst að greina umferð um stíginn. Jafnframt skal minnt á mikilvægi þess að vegfarendur á hjóla eða göngustígum gæti þess að fara ekki of hratt þannig að ekki skapist óþarfa hætt fyrir þá vegna þeirra sem þvera stíginn í góðri trú um að leiðin sé greið.