Hjólað á akbraut
tilmæli til hjólandi
Hér er farið yfir mikilvæg atriði sem vert er að hafa í huga þegar hjólað er á akbraut:
Staða á akbraut
Þegar ekið er fram úr reiðhjóli eða léttu bifhjóli skal hliðarbil vera að lágmarki 1,5 metrar. Hjólreiðamaður á almennt að halda sig hægra megin á þeirri akrein sem lengst er til hægri. Þó er óhætt að hjóla á miðri akrein á vegi þar sem hámarkshraði er ekki meiri en 30 km.
Breytt um stefnu eða stöðvað
Hjólreiðamenn skulu gefa stefnumerki með því að rétta út hendi áður en þeir beygja eða áður en þeir breyta um stöðu á akrein. Þeir verða að gefa stefnumerki þar sem ökumenn bíla eiga að gefa stefnuljós. Það á einnig að gefa stöðvunarmerki með því að beina hægri hönd upp þegar stöðva skal eða hægja þarf för. Áður en merki er gefið ætti að líta aftur og gæta að umferð.
Framúrakstur á hjóli við gatnamót
Ef hjólað er framúr hægra megin skapar það hættu á að bílstjóri beygi til hægri á gatnamótum í veg fyrir hjólið. Bíða á í röð líkt og önnur ökutæki. Það er mjög hættulegt að hjóla hægra megin fram úr stóru ökutæki.
Hringtorg
Í hringtorgi með einni akrein á hjólreiðamaður að hjóla sem næst miðju akreinarinnar í ríkjandi stöðu áður en hann kemur að hringtorginu og fari þannig í gegnum hringtorgið og út úr því þar til óhætt er að færa sig til hægri.
Hringtorg með tveimur akreinum eru flóknari og þar getur reynst varasamt að hjóla, sérstaklega í mikilli umferð. Við þessar aðstæður getur verið heppilegast að ná sama hraða og önnur umferð. Hjólreiðamaður færir sig tímanlega sem næst miðju akreinarinnar og hjólar í umferðarstraumnum á þeirri akrein sem hann velur í hringtorginu. Hjólreiðamaður á að vera í ytri hring ætli hann út á fyrstu útkeyrslu. Best er að vera í ytri hring ef fara á út á annarri útkeyrslu úr torginu en ef farið er lengra getur borgað sig að vera í innri hring.
