Umferðaröryggisáætlun

Umferðaröryggisáætlun er stefnumarkandi áætlun og er sett til fimmtán ára.  Í þeirri áætlun er að finna töluleg markmið sem og áherslur og stefnu í umferðaröryggismálum. Gildandi umferðaröryggisáætlun er frá 2020-2034 og má finna hér.

Aðgerðaráætlun er sett til fimm ára. Í þeirri áætlun er að finna lýsingu á þeim verkefnum sem farið verður í til þess að ná markmiðum og halda þeirri stefnu sem sett er í fimmtán ára áætluninni. Gildandi aðgerðaáætlun er frá 2020-2024.

Í umferðaröryggisáætlun er annars vegar að finna markmið um fækkun slysa og hins vegar markmið um bætta hegðun. Markmiðum um fækkun slysa er svo skipt í yfirmarkmið og undirmarkmið.

Yfirmarkmiðin eru tvö:

 

• Að Ísland verði í hópi fimm bestu Evrópuþjóða hvað varðar fjölda látinna í umferðinni á hverja 100.000 íbúa.
• Að látnum og alvarlega slösuðum fækki að jafnaði um 5% á ári til ársins 2034.

 

Til þess að styðja við yfirmarkmiðin eru sett 11 undirmarkmið þar sem hvert markmið lýtur að því að fækka ákveðinni gerð slysa eða slysa meðal ákveðins hóps og styður það þannig við síðara yfirmarkmiðið.

Markmið um bætta hegðun eru sett fram í fyrsta skipti í gildandi áætlun en ef okkur tekst að bæta hegðun í umferðinni má segja að við bætum umferðarmenningu og fækkum þannig slysum. Nánar má lesa um markmiðin í umferðaröryggisáætluninni sjálfri .