Verklagsbók: ADR-skoðun
Atriði til skoðunar og sérkröfur
Skjalið tilheyrir skoðunarhandbók ökutækja. Um lögformlega stöðu, útgáfu og ábyrgð á skjalinu vísast til formála handbókarinnar.
Í skjalinu er að finna skoðunaratriði og sértækar kröfur um framkvæmd skoðunarinnar.
Stjórnvaldskröfur
Stjórnvaldskröfur sem skjalið byggir á er að finna í eftirfarandi lögum, reglugerðum og/eða reglum (með viðbótum eftir því sem við á):
- Umferðarlög nr. 77/2019.
- Reglugerð um gerð og búnað ökutækja nr. 822/2004.
- Reglugerð um skráningu ökutækja nr. 751/2003.
- Reglugerð um flutning á hættulegum farmi nr. 1077/2010.
- Evrópusamningur um flutninga á hættulegum farmi á vegum, sem undirritaður var í Genf 1957 / ADR-samþykktir, kafli 9.
- Reglugerð um slökkvitæki nr. 1068/2011.
- Lög um farþegaflutninga og farmflutninga á landi nr. 28/2017.
- Reglugerð um leyfi til að stunda farþegaflutninga og farmflutninga á landi nr. 474/2017.
ADR-skoðun: Kröfur til skoðunarmanna
Gerð er krafa um að skoðunarmaður hafi verið viðurkenndur samkvæmt eftirfarandi (gildir frá 01.01.2024):
- G- og S- viðurkenning, eftir því sem við á miðað við stærð ökutækja.
ADR-skoðun: Umfang og ferli
Umfang
Við ADR-skoðun fer fram athugun á því hvort ökutæki uppfyllir kröfur sem til þess eru gerðar eins og lýst er í leiðbeiningaskjali stoðrits um ökutæki sem flytja hættulegan farm. Samantekt á þeim atriðum eru í þessu skjali.
Auðkenning ökutækis
Sérstök áhersla er lögð á að allt verksmiðjunúmerið sé skoðað og vandlega borið saman við skráningargögn. Ef um frávik er að ræða skal hafna skoðun og skráningu.
ADR-skoðun: Skoðunaratriði
Í töflu 1 eru talin upp þau atriði sem skoðuð eru í ADR-skoðun. Aðeins er hægt að dæma atriðin í flokk 2 sem þýðir að athugasemd hafi verið gerð við atriðið.
Tafla 1. Skoðunaratriði fyrir áskilinn búnað ADR-ökutækja (bæði bifreiða og eftirvagna eftir atvikum).
Nr | Atriði | Skýring |
---|---|---|
A05 | Slökkvitæki | Bæði bifreið og eftirvagn. Sjá kröfur í Töflu 5. |
A10 | Stoppklossar | Einn stoppklossi fyrir hvert ökutæki og skal miða stærð hans við þunga ökutækis og stærð hjólbarða (þ.e. þvermál). |
A15 | Aðvörunarmerki | Tvö frístandandi aðvörunarmerki (í bifreið). Sjá kröfur neðst í kaflanum. |
A20 | Augnskol | Augnskolvökvi í bifreið fyrir áhöfn hennar (þarf ekki fyrir varning með varúðarmerki nr. 1., 1.4, 1.5, 1.6, 2.1, 2.2 og 2.3). |
A25 | Merkingar | Ferhyrnd appelsínugul merki, búnum endurskini. |
Tafla 2. Skoðunaratriði fyrir sérstakan búnað fyrir ökumann og eftir atvikum aðstoðarmann hans (í bifreið).
Nr | Atriði | Skýring |
---|---|---|
S05 | Endurskinsfatnaður | Endurskinsvesti eða endurskinsklæðnaður í bifreið (í samræmi við kröfur skv. staðlinum EN 20471) fyrir hvern áhafnarmeðlim hennar. |
S10 | Vasaljós | Í bifreið, án málmyfirborðs sem gæti myndað neista. |
S15 | Hlífðarhanskar | Eitt par fyrir hvern áhafnarmeðlim bifreiðar. |
S20 | Augnhlífðarbúnaður | T.d. öryggisgleraugu, fyrir hvern áhafnarmeðlim bifreiðar. |
Tafla 3. Skoðunaratriði fyrir búnað tiltekinna áhættuflokka (bæði bifreiða og eftirvagna eftir atvikum).
Nr | Atriði | Skýring |
---|---|---|
T05 | Öndunargríma | Í bifreið. T.d. öndunargríma með samsettri gassíu/ryksíu af gerðinni A1B1E1K1-P1 eða A2B2E2K2-P2 (eða í samræmi við kröfur sem fram koma í EN 14387:2004 + A1:2008 staðlinum) fyrir ökumann og eftir atvikum aðstoðarmann hans þegar fluttur er varningur með varúðarmerki 2.3 eða 6.1. |
T10 | Skófla | Aðeins krafist þegar flutt eru föst eða fljótandi efni með varúðarmerki 3, 4.1, 4.3, 8 og 9. |
T15 | Þéttibúnaður fyrir niðurföll | Aðeins krafist þegar flutt eru föst eða fljótandi efni með varúðarmerki 3, 4.1, 4.3, 8 og 9. |
T20 | Uppsöfnunarílát úr plasti | Aðeins krafist þegar flutt eru föst eða fljótandi efni með varúðarmerki 3, 4.1, 4.3, 8 og 9. |
T25 | Þrýstiprófun á áföstum tanki | Aðeins krafist fyrir ökutæki með áföstum tank: Framvísa gilda þrýstiprófun tanks annaðhvort með skoðunarskýrslu frá Vinnueftirlitinu eða merkingu á tank. |
Tafla 4. Einfölduð framsetning á áskildum búnaði fyrir tiltekna efnisflokka.
Nr | Atriði / Efnisflokkur | 1 | 2.1 | 2.2 | 2.3 | 3 | 4.1 | 4.2 | 4.3 | 5.1 | 5.2 | 6.1 | 6.2 | 7 | 8 | 9 |
---|---|---|---|---|---|---|---|---|---|---|---|---|---|---|---|---|
A10 | Stoppklossar | X | X | X | X | X | X | X | X | X | X | X | X | X | X | X |
A15 | Aðvörunarmerki | X | X | X | X | X | X | X | X | X | X | X | X | X | X | X |
S05 | Sýnileikafatnaður | X | X | X | X | X | X | X | X | X | X | X | X | X | X | X |
S10 | Vasaljós | X | X | X | X | X | X | X | X | X | X | X | X | X | X | X |
A20 | Augnskol | X | X | X | X | X | X | X | X | X | X | X | ||||
S15 | Hlífðarhanskar | X | X | X | X | X | X | X | X | X | X | X | X | X | X | X |
S20 | Augnhlífðarbúnaður | X | X | X | X | X | X | X | X | X | X | X | X | X | X | X |
T05 | Öndunargríma | X | X | |||||||||||||
T10 | Skófla | X | X | X | X | X | ||||||||||
T15 | Þéttibúnaður fyrir niðurföll | X | X | X | X | X | ||||||||||
T20 | Uppsöfnunarílát úr plasti | X | X | X | X | X |
Tafla 5. Lágmarkskröfur til slökkvitækja í ADR-flutningseiningum. Uppgefin stærð er fyrir dufttæki eða tilsvarandi slökkvimátt með öðru heppilegu slökkviefni. Miðað er við leyfða heildarþynd flutningseiningar.
Slökkvitæki (línur) / Flutningseining lhþ (dálkar) | ≤3,5t | >3,5t og ≤7,5t | >7,5t |
---|---|---|---|
Lágmarksfjöldi slökkvitækja | 2 stk | 2 stk | 2 stk |
Lágmarksstærð allra slökkvitækja samtals | 4 kg | 8 kg | 12 kg |
A.m.k. eitt slökkvitæki hentugt til að slökkva eld í vél eða stjórnhúsi bifreiðar, lágmarksstærð | 2 kg | 2 kg | 2 kg |
A.m.k. eitt slökkvitæki, lágmarksstærð | 2 kg | 6 kg | 6 kg |
Slökkvitæki
- Slökkvitæki í ökutæki skal vera af viðurkenndri gerð fyrir A, B og C brunaflokka og skal vera komið fyrir í festingum sem því er ætlað.
- Handslökkvitæki eiga að vera með innsigli svo hægt sé að sannreyna hvort þau hafi verið notuð.
- Staðsetja skal slökkvitæki þannig að þau séu auðveldlega aðgengileg fyrir áhöfn ökutækisins og að þau séu varin veðuráhrifum þannig að nothæfi þeirra verði ekki fyrir áhrifum.
- Sé ökutæki búið áföstu slökkvikerfi til þess gert að slökkva eld í vél, skal það þannig búið að það losi ekki eitraðar loftegundir inn í stjórnhús bifreiðarinnar eða vegna hita frá eldi.
- Á slökkvitæki skulu vera leiðbeiningar á íslensku um notkun þess.
- Ef áskilið slökkvitæki er dufttæki skal það vera með innan við ársgamla vottun frá viðurkenndri slökkvitækjaþjónustu um að slökkvitækið sé í lagi.
- Eitt 2 kg duftslökkvitæki (eða tilsvarandi slökkvimátt með öðru heppilegu slökkviefni) er nægjanlegt í ökutæki sem flytja hættulegan farm í stykkjavöru samkvæmt undanþágureglum sem fram koma í ADR reglum (1.1.3.6) og 11. gr, reglugerðar um flutning á hættulegum farm.
ADR-skoðun: Frávik og niðurstaða
Frávik við ADR-skoðun og niðurstaða
Sé gerð athugasemd við eitthvert skoðunaratriði verður niðurstaða skoðunar „Endurskoðun“ og ökutækið telst ekki hafa staðist skoðunina. Eigi að skrá ökutækið í viðkomandi rekstur í framhaldi af skoðun er þeirri skráningu hafnað. Annars er heimilt er að klára umsóknarferil og/eða staðfesta áframhaldandi leyfi fyrir viðkomandi ökutæki.
Númer skoðunaratriða
Númer skoðunaratriða á skoðunarvottorði eru ADR.xxx.2, þar sem ADR er fast forskeyti, xxx er númer atriðis hér að ofan, og 2 er fasti sem þýðir að athugasemd hafi verið gerð við atriðið. Dæmi: ADR.T05.2 merkir að athugasemd hafi verið gerð við öndunargrímu.
Breytingasaga skjalsins
Hér sjást efnislegar breytingar sem orðið hafa á texta skjalsins og dagsetning þeirra. Breytinga er ekki getið nema þær hafi efnisleg áhrif (ekki er getið smávægilegra breytinga á orðalagi, leiðréttinga eða breytinga á uppsetningu skjalsins).
Dagsetning | Efnislegar breytingar |
---|---|
30.01.2023 | Nýtt atriði T25 í töflu 4, þrýstiprófun á áföstum tanki. |
01.01.2023 | Nýtt skjal. Efni tekið unnið upp úr kröfum í lögum og reglugerðum um ADR flutninga. |